Cae Ba’e Keu Bansa
Keunarang : Tarmizi Thaib
lahien lahien si ticem murong
diateuh tampong meuhayon doda
gasien gasien hudep bangsa long
saba hai ampon dang dang sijahteura
bek neujak pateh haba boh lam Oen
haba peu hayon dum calon raja
tanyoe jipeugot keu tutue sambong
lheuh nyan rakan lon tanyoe jilupa
nyoe teungoh peurlei gata jipeutow
jok haba laloe ngen tipu daya
watei kajiduek jingeuk hanjeut tow
peugah sibok droe rapat meubura
kayoh kayoh raket u nanggroe
marwah tapuwoe lagei yang ka ka
lakei bak allah nibak saboh roe
aceh beu meuwoe yoh masa raja
rakyat lam seunang rata jeut sagoe
bekna yang phang phow beuseujahteura
adakpih raja beuna geuthei droe
rakyat geuhiroe tuha ngen muda
bek lagei jinoe tan meuhoe sahoe
jipeukaya droe meukuba kuba
jipeugah meunoe jipubuet meudeh
keubit sep paleh wahe syedara
Keu ureung gasien sabe lam tuwoe
Cit han jipakow wahe syedara
Di Aneuk yatim meukuwien Sidroe
Sabe tiep uroe hudep seungsara
Oh tow pemilu peugah hayeu droe
Meunan keuh bagoe ji ilah daya
Jak sipreuk janji rata jeut sagoe
Janji jok leumoe modal usaha
Kruu seumangat Rahmat meuhimpon
Mandum rakan lon tuha ngen muda
Keu korban konflik hai putik payong
Kuta ngen duson beuna neukira
Yoh gohlom syahid na Ayah soe com
Aneuk geusanjong geu manja manja
Geu gapiet gapiet geulambong lambong
Allahu rabbon seudeh leupah na
Adak tumon bu kuwah on murong
Seunang hate long sajan ayahanda
Nibak si uroe ayah ka geutron
Ayah meugabong jak bela Bangsa
Tan kamoe sangka wahe rakan long
Ayah ka geutron tan le meugisa
Teuka beurita runyoh hate long
Geuwoe bak Rabbon lam seuh prang raya
Allahu Rabbi mutabasshiron
Allah yang tulong ateuh sigala
Watei lon ingat ie mata jitron
Tega that kawom lageinyoe cara
